上月初邓兆尊曾在YouTube暗示曾志伟将要离开TVB，周日（19日）TVB台庆2023后曾志伟接受访问，就大谈有关其职位变动的传闻，又提到在台上颁发42万奖金给郭珮文（Juliana）时，取笑她好似未瞓醒一事！

阅读全文

TVB台庆2023｜曾志伟讲职位变动：我惊变咗老闆

曾志伟在访问中被问到职位可能有变动一事，笑言：「我惊变咗老闆，即係跳级，唔好啦！变乜鬼嘢，仲有咩变，我平时都係同所有员工、同事打成一片，我觉得职位係唔重要，最重要係你做到咩嘢，你做唔到好成绩，畀你坐更高位都冇用。所以我对呢样嘢唔係好着紧，我做戏都做咗咁多年，同埋自己年纪都唔细，但求做好件事。」

TVB台庆2023｜曾志伟学坤哥话斋：一步一步咁行落去

被问到有冇打算继续做几多年？曾志伟回答：「真係冇，好似头先阿坤哥讲咁样，係一步一步咁行落去。由我啱啱入嚟到依家呢日，好多同事已经好明白，大家一齐走落去条路要点行。初初同大家一齐行嗰时，大家都仲喺度捉摸紧我想要啲乜嘢，但係到依家大家都好明白，同埋大家都好齐心去做。」而讲到对未来的计划，他就表示：「有嘅，但係好难喺依家就马上讲畀大家听，今晚等我享受完今晚嘅赛果先。」

TVB台庆2023｜曾志伟讲郭珮文攞奖：要鞭策吓佢

讲到郭珮文（Juliana）赢得42万奖金后表情呆滞，被曾志伟问她：「你未瞓醒咩？」曾志伟笑言：「佢个人係咁㗎，我同佢綵排时已经係咁，佢成日都係错咗又唔知错咩，做得好佢又唔知做得好咩，所以有时artist係要鞭策，攞奖都要鞭策吓佢！咁其实攞奖係好开心嘅事㗎嘛，四十几万喎，佢都仲可以…（发梦？）我谂佢以为係做骚，一阵间会收返，我知攞车嗰个小朋友都係，正想话畀大家听我哋真係冇内定，如果有内定就唔会咁嘅表情啦！」

TVB台庆2023｜台庆表演曾志伟畀100分

而讲到台庆的表演，曾志伟就话要畀100分：「唔係话所有节目真係做得好好，但我係畀所有同事100分，因为每个人都尽心尽力，为咗TVB生日，好似自己屋企摆酒咁样，为咗啲来宾去做好自己，可以睇到佢哋每一个团队精神。其实今朝綵排嘅时候都见到，有啲同事拍紧剧唔得闲嚟，宁愿请老师帮佢喺片场排，有啲喺屋企自己练，都要做好自己嗰part，我觉得呢啲team spirit好难得。」

TVB台庆2023｜曾志伟：要摆出诚意畀观众睇

曾志伟续指：「即係同我哋以前做主持一样，每一part都要大家击掌，good show！good show！咁样，呢个係好重要嘅，今朝綵排嗰阵时，我已经同大家讲，我哋做节目有一样嘢最重要，就係一定要摆出诚意畀观众睇，观众个个都係叻人嚟，你有心做定hea住做大家係知嘅，今日观众係完全接受到，觉得佢哋每一个同事都係用心去做好自己嘅每一part，咁所以得返嚟嘅反应係咁好。」

TVB台庆2023｜指初初綵排近乎有啲难睇

被问最锺意节目边一part，曾志伟表示：「part part都锺意，除咗祥仔（阮兆祥）嗰part，其他我都研究过，都知係咩，佢哋嗰三个讲咗畀我听，但我唔知係排咩嘢，其余嗰啲綵排时我都见过，由初初唔係几好睇，近乎有啲难睇，到噚晚排到深夜4点几，再开会，到今朝中午再返嚟，切烧猪，再排，然后，都未去到好睇，但大家所有人眼里面都充满火，起码大家真係好用心，好有信心去做好今晚，做完之后见到大家个情绪，我就知道，今日唔只大家满意，佢哋自己都好满意！」

TVB台庆2023｜明年主题要突破求变

而讲到明年TVB台庆主题，曾志伟就话：「其实我哋都係过完一关又一关，港姐完咗就等台庆，台庆完咗就plan出年嘅嘢，我每次都係畀一个主旨大家，我唔希望大家度啲嘢里面係空寥寥冇内涵嘅，譬如呢两年我返嚟，第一年係『追梦』，旧年就係『传承』，今年就係『初心』，等所有监製、同事、编剧大家都知道要度咩，知道要畀观众睇咩，要接受咩讯息，明年我有少少同大家提过嘅，就係因为我哋做咗56年，好多嘢都係做怀旧，希望我哋明年係『突破』、係『变』。」

TVB台庆2023｜口号係「娱乐变身」

究竟点「变」？曾志伟续说：「其实变唔係一定话全部都新，呢个世界冇可能全部都新，係旧瓶新酒，因为我哋拍电影都係，依家我哋都离唔开差利卓别灵嘅年代，即係笑中带泪、泪中又笑，其实我哋今日个台庆都係，我哋有十年嘅感人，但係都有福禄寿嘅搞笑啦，係接住一part又一part，带畀观众唔同嘅情绪，咁样先至令观众觉得『好嘢！可以引住我哋嘅情感去走』，另外就係睇到大家嘅齐心，明年我都希望向住呢个方针去走、去求变，暂时畀大家嘅口号係『娱乐变身』。」

福利视频，稀有资源请前往新站下载：zuisiji.top